انصار: ( دغبرګولی ۱۲)، ستره محکمه وايي، په خوست، غزني او کندز ولایتونو کې یې ۱۵ تنه د بېلابېلو جرمونو په تور په دُرو وهلي دي.
سترې محکمې په یوه خبرپاڼه کې ویلي، د خوست ولایت د ښاري ابتدائیه محکمې د جزا او امنيت عامه دېوان د پرېکړې په اساس ۱۰ تنو ته چې پر لواطت، نامشروع اړيکو او فريبکارۍ متهم وو، په عام محضر کې تعزیري سزا ورکړل شوه.
خبرپاڼه کې ویل شوي، د متهمينو له جملې څخه شپږ تنه پر درې کاله تنفيذي بند او ۳۹ دُرو تعزیري سزا، یو تن پر ۱۵ میاشتو تنفيذي بند او ۳۹ دُرو تعزیري سزا، اتم متهم پر دوه کاله تنفيذي بند او ۳۹ دُرو تعزیري سزا او دوه نور متهمين پر شپږ میاشتې تنفيذي بند او ۳۹ دُرې تعزیري سزا محکوم شوي وو.
سترې محکمې په ورته مهال ویلي، په کندز ولایت کې څلور تنه د زنا، لواطت او بچه بازۍ په جرم په عام محضر کې په دُرو ووهل شول. سترې محکمې ویلي، ددې کسانو له ډلې یو یې، په شپږ میاشتې تنفیذي بند او ۳۹ درو، دوهم کس په څلور میاشتو بند او ۳۹ درو او دوه نور په دوه کاله بند او د ۳۹ـ۳۹ دُرو پر وهلو محکوم شوي وو.
سترې محکمې دا هم ویلي، چې د غزني په خواجه عمري ولسوالۍ کې يو تن چې پر غلا متهم و، په عام محضر کې ۲۰ دُرې ووهل شو.
URL تعقيب: https://www.ansarpress.com/pashto/31860
